繁體  |  简体  |  English  |  Search Search  |  Subscribe  |  Facebook Page  |  Youtube Channel
Arts News
TOUCH 20th 創勢力連載 阿德×小克×10大生力軍 – East Touch (01-07-2015)
01/07/2015
A088-097 | culture

2013年《TOUCH》與大家一起回顧「本土創勢力」的最強10位畫家,上年就介紹了10位本土的插畫師,繼續發堀不同「創勢力」單位,每位都有着自己獨特的構思及風格,雖知在香港搞藝術絕對不是一件易事,但可見其實還有很多對藝術這方面有衝勁的人,都依然繼續堅持自己所想所做的。如果有睇開《TOUCH》的朋友,都應該留意到創作人小克及阿德每期都會有故事或插畫連載着,這次決定再玩癲啲,與10位插畫師以接龍形式連載一個漫畫故事「東TOUCH 20周年巨獻怒插接龍記」。喺開始呢個故事之前,先看看他們到底有怎樣構思及今年有甚麼創作大計吧。

龍頭老師

阿德

話明漫畫接龍總要有一個作始吧,是次企劃找來阿德老師作龍頭,經過上個月一同開會後,基本上是還未有題材的共識,全交由阿德老師發板。對於今次《TOUCH》20周年漫畫接龍企劃,阿德說:「早喺10零年前都同小克、B.Wing、智海佢哋玩過一次喇,詳細畫過啲乜就真係唔記得晒,哈哈!不過漫畫接龍係好玩嘅,因為要後面接嗰批不斷扭橋,可以完全同上一手唔同方向之餘,成個故仔又講得通就真係過癮,同埋因為每個artist都有唔同諗法,千祈唔好就咁承接上一個咁平講故仔囉。」正所謂後浪推前浪,在香港,其實亦有着不同類型的畫家、插畫師,阿德老師也認為新一代的風格很出色,有個人風格之餘又有青春這個最大本錢,他補充說:「其實自己都畫咗好耐,都係畫緊自己一路以嚟嘅嘢,動力已經不及當年勇,所以希望一班新artist可以玩得癲啲放啲。」身為漫畫接龍的開頭者,阿德老師也坦言是最輕鬆的一個,「我只須留下一兩個伏線俾後面接力、發大,反而就替「守尾門」嘅小克擔心,因為呢個位置任重道遠,要總結之前11回故事發展,真係少啲功力都唔得㗎,所以由小克做番啦,哈哈!」阿德補充說。忙完3月的POP-UP PRESS絲印展後,阿德未來的個人企劃也令人期待,原來他有意在明年3月至5月內辦畫展,現在已經埋首製作。

諗唔島島主

小克

一手湊大了肥嘢聾貓及Bit Bit十多年的小克,除了是漫畫家、插畫師外,更是多才多藝的多媒體創作人,更進軍填詞界,為Eason、周國賢、張繼聰等歌手寫下不少動人作品。回歸到畫板上,小克老師同樣是今回漫畫接龍的策劃者之一,並包辦結局埋尾的終極任務,「漫畫接龍最正之處係你唔知下一個會諗到啲乜囉,因為每個人諗嘢都好唔同,相信會俾到好多驚喜予讀者,此外亦都要好有技巧地承接上手同埋啲伏線俾下一手發揮,不過例如拍緊偵探片變咗愛情片都得意嘅,唔知呢,要畫到出嚟先知。我估今次經過畫完一次接龍之後,佢哋會學到好多嘢㗎喇,起碼睇到唔同人點諗,啲料就喺晒到喇,但係嗰個炒出嚟都可以唔同味道㗎嘛,甚至變咗第二味菜都唔定。」小克老師說。對於自己的創作之路上,小克和阿德都多次說到二人的模式已經固定得太久,連自己都感到有點厭悶,反而新一代80、90後會帶來新刺激,小克老師繼續說:「我最近成日睇網上嘅惡搞片,睇得出佢哋好出力、好有creative、充滿energy,覺得佢哋開始主導呢個市場,所以我都自薦畫最尾嗰個,so far而家見到呢10位新artist都好快手、好積極吖,同埋喺whatsapp入面有好多討論,睇咗啲初稿講真又真係OK對板,所以我都唔係太擔心會爛尾。」今年小克老師亦在專欄上提到會暫時放下畫家身分,以填詞人角色推出《廣東爆谷》新書,想知內容大約講咩揭去小克專欄有提示!

是次與阿德、小克合作的10大生力軍,亦是在上年介紹過的十個新創作單位,漫畫接龍可以說是將他們每個人的不同風格放入一個故事之中。

立體小明

由Kila所創作的角色小明,通常都只會在一些插畫中出現,而成為一套漫畫中的角色,相信是第一次,「創作人們開會時,提出咗兩個方案,一個係插畫方向嘅合作,同現在揀咗嘅漫畫接龍方案,因為我之前冇自己去創作漫畫嘅經驗,所以覺得前者應該會比較得心應手,但對漫畫接龍合作感覺好刺激,好有挑戰性,所以我應該係懷着興奮又緊張嘅心情去參與呢次合作。而我喺10月會喺台北國際玩具創作展中,有一個小畫展,而家都正在準備緊展覽嘅畫作,當然都會推出小明系列嘅第3隻限量雕塑作品,仲想喺今年畫一本小小嘅圖畫書仔,希望有足夠時間將佢哋一一實現啦。」

一本森林

平時有創作開漫畫作品的ANGRYANGRY,相信對於畫漫畫的技巧必定駕輕就熟,「之前試過同其他畫家一齊搞過展覽,但接龍講故事係首次,以前我都有去畫連載漫畫,都鍾意用二次創作其他人嘅角色,但都係屬於自己嘅創作,不過今次個玩法就好唔同,係要更緊密合作,互動性相當強。而今年我亦會自資推出一本彩色漫畫《無病森林》,係一百則有關香港人的生心理都市病,故事中妹釘嘅無病呻吟,驟看係啲幼稚想法同超現實念頭,但可能已經刮咗大人一巴,對政治、經濟、環保、世代之爭嘅價值觀。而且下半年會嘗試投入紙模型或者半摺紙半插畫嘅作品。另外喺7月25日下午3時在尖沙咀海港城PageOne有分享會,到時見啦!」

雲的世界

早前Miloza已經有創作過一些漫畫接龍的作品,以她的風格特色來說,絕對是相當少見的漫畫作品,「因為最近喺另一個創作項目中,都試過去畫漫畫接龍,加上可以和另外11位插畫師再畫一次接龍,真係覺得好興奮。其實今年我已經和4位插畫師創作漫畫接龍,係接繪世界經典文學《Alice In Wonderland》並為故事進行大改篇及將人物以自己的風格重新演繹。而喺今年7月尾至8月頭會係K11 Art Mall展出一些的CG插畫,而11月會搞個人畫展,請密切留意啦。」

怪誕城

看到Ko Sing的作品,不期然就會想起了類似《怪誕城》的暗黑風格,而且Ko Sing也有談及他的漫畫創作經驗,「對於今次合作其實都有啲緊張,但又覺得好好玩,又可以同小克、阿德兩位大師及多位插畫師朋友一齊去做一個計劃。之前我都有創作過一啲類似嘅接龍作品,就係同小雷、Graphic Airlines、start from zero去crossover做咗一個《3隻小豬》嘅作品。而今年亦都同其他嘅創作人去製作咗一本漫畫接龍《Alice In Wonderland》,所以都累積咗好多唔同嘅漫畫創作經驗。不過下半年就未有太多嘅新搞作,因上年都舉辦咗一個畫展,雖然好想每年都keep住有個畫展,希望嚟緊可以有多啲活動搞啦。」

音符畫章

Katie的作品有很多不同的題材、類型,畫風也比較是柔和,比較少女的感覺,不過最近Katie在畫風上就有一大突破,一改以往的風格。「能夠同眾多不同風格類型嘅創作人聯手創作,當然係相當興奮,而且故事將會有很多變化,對我嚟講漫畫接龍絕對係一個新嘗試。以往我創作嘅題材都主要係關於自己為主,不過最近就聯同電影、音樂迷去創作咗一個繪畫品牌Animovie,係我哋虛構嘅影音店名稱,內容主要是圍繞住一班店員,佢哋用畫作去重新演繹各種電影、音樂同生活感受,無論是內容、風格和畫畫工具都跟我以往嘅作品完全唔一樣。我喜歡新嘗試,呢啲經驗可以俾到我日後新嘅靈感。」

社區塗鴉

Graffiti給各位的印象可能是一些主要在牆上的街頭作品,到底如何去將這類的藝術風格在漫畫上展現出來,絕對是令人期待。「呢次合作,都令我哋諗起電影《回魂夜》入面傳炸彈嗰一幕,到底個故事幾時爆、會點樣完結係好令人期待的,漫畫接龍最好玩嘅地方就係估唔到上一手會畫啲咩劇情出嚟,你又會點設計一個故事去帶俾下一手咁。之前冇呢方面嘅經驗,所以對我哋嚟講個感覺係好新鮮,加上可以認識到唔同類型嘅畫家朋友,一齊去合作做一個創作,呢樣先係最重要、最值得開心嘅事。嚟緊會向社區藝術呢個方向發展,因為始終我哋畫嘅嘢都係牆上,所以希望透過一個公共空間嘅創作平台,可以令到更加多人接觸到藝術,同埋分享到我哋作品背後所帶出嘅正能量。另外7月4號會喺太古坊Artis Tree有一個同HKYAF合作,關於土瓜灣歷史與人嘅展覽,希望大家可以到場支持。」

爆炸頭加兩點

一個爆炸頭已經令人增添不少娛樂,難怪HELLO WONG總是那麼受人喜愛,畫漫畫更可以說是他的一個新發展方向,「今次呢個合作的確幾新鮮,可以同唔同嘅插畫家合作,去構思一個長故事,係一個幾好玩嘅構思,加上有合作成份之餘又有空間俾自己發揮,相信成個故仔出到嚟一定非常天馬行空。其實我之前都有試過同幾個插畫家去畫相同題目嘅野,但係之間就冇關聯性,故此同今次嘅合作好唔同,亦好期待到底可以玩到啲咩出嚟。喺今年應該都會繼續畫多啲唔同題材嘅嘢,又或者去努力成為一個食軟飯嘅男人吧(笑)。」

抽到盡

平時在網上不難看到DDED創作的短片,不過漫畫創作,你又有冇睇過?「其實漫畫接龍喺我好細個嘅時候已經開始玩㗎啦,小學5、6年班嗰陣時,我就已經好鍾意畫漫畫、睇漫畫,忽發奇想不如同幾個朋友一齊去玩下,我畫一格佢畫一格,成個故仔變得更有趣,不過好似今次咁正正式式去同一啲畫家去玩呢個遊戲就真係第一次。平時除咗會製作一啲短片外,今年亦都有一個新嘗試就係搞咗個公開活動「積木廢柴機械人大戰」,可以俾參賽者發揮創意,喺有限時間去砌出一個積木機械人去決戰,另外仲會推出一本書,主要係以香港社會問題為主題,而且會係一本好荒謬嘅幼兒書嚟,從而可以反映出現今社會係有幾咁荒謬。」

古靈精怪

平時多數只畫插畫作品的她,對於漫畫這方面,絕對是一個相當新鮮的嘗試。「入行之前喺外國嘅時候已經好崇拜兩位大師小克同阿德,經常都有留意佢哋啲作品,今次亦好開心有幸可以參與呢個project,而且呢個玩法相當好玩,大家嘅風格都好唔同、充滿個性,所以出嚟嘅效果一定十分有趣,可以擦出不一樣嘅火花!喺讀書嘅時候好喜歡同同學玩一個遊戲,大家喺同一張畫紙上畫畫,一個先開始畫一部分然後下一個接住畫,因為大家都唔知道對方係想畫咩,所以出到嚟嘅結果都會好有創意,與今次合作比較類同。喺今年最大嘅改變就係除咗畫畫、製作立體收藏玩具和繪本創作外,亦會開始畫一啲面積較大嘅畫作,雖然會花多好多心機,但滿足感倍增,同埋開始會比較注重自己作品背後嘅意思。另外仲會開始將自己嘅風格套喺fashion illustration同steampunk嘅theme上。」

獨特山水

William筆下的風景畫作,總有一種說不出的神秘感覺將你吸引住,將平時所見的地方,都變得份外有層次,不過漫畫這方面的創作對他來說又有沒有難度呢?「好開心可以同兩位大師及其他出色嘅創作人及好友去參加呢個有趣嘅活動,從來未試過咁多人一齊去創作一件事,之前都只不過係畫過一次四格漫畫,或者係插畫方面嘅接龍,而漫畫接龍就真係未試過,加上我平時都好少睇漫畫更加少畫漫畫,所以對我嚟講絕對係一個好大嘅挑戰。而今年就想去想挑戰一啲更大型嘅畫作,希望今年內可以再舉辦一個個人展覽啦。」

精彩預告

由小克、阿德連同10個生力軍單位所創作的漫畫接龍,由阿德命題「怒插接龍記」當中嘅劇情會有幾瘋狂,真係不能想像,每位都將自己所想加入到漫畫之中,其實頭三回已經ready好就俾住少少各位睇住先,吊下你哋癮。

這個漫畫接龍將會由阿德作開頭,故事就在一間課室開始,點知一嚟就有命案發生,似乎展開了一個離奇、搞笑的偵探故事!

第2集將會由Kila Cheung去繼續阿德發展的故事發展,一開始就已經有角色死了,各位小明又會點收科呢?

接下來就是由AngryAngry去承接故事,經過短短3集的故事,就已經變到天馬行空,就連整間學校都變成了機械人…。

text 羊、祺 photo Oscarart 果占