繁體  |  简体  |  English  |  Search Search  |  Subscribe  |  Facebook Page  |  Youtube Channel
Arts News
Local Art News: 畫字佬Kit Man勁揪體登場 開蚊型展騷原稿 – 明週 (1-12-2018)
06/12/2018

兩年前,「勁揪體」眾籌達標,創作人Kit Man多咗一堆課金支持的「老細」,開展日寫夜寫的生活。化歪歪斜斜毛筆字為好好睇睇的電腦字,可謂「粒粒皆辛苦」。揸緊信念瞓身七百三十天後,大嗱嗱六千粒字要出世了。Kit Man笑謂:「出咗個頭㗎啦﹗」為隆重地宣佈字體出籠,他搞了個「蚊型展覽」。現場有一個《原稿展區》,四百四十粒字內藏大量俗語,打橫打直打斜能組合出「塞竇窿」、「貪得意」、「餓狗搶屎」等等,考大家眼力及俗語造詣。另外亦有一個互動投影裝置《文字瀑布》,廣東話詞語從高處不斷掉下,閣下想抱住、撥開、推走皆可,玩法悉隨尊便。

有醜唔怕獻
這套字體被冠以「勁揪體」大名前,一直被他戲稱為「獻醜體」。「醜仲係照獻。基本字型都係醜㗎,但變成電腦字體後字與字之間的一體感強咗,外圍會比較方正,排列起來會順眼啲。」他自稱推出「勁揪體」是「連環獻醜」,皆因毛筆書法及字體設計都不是他的本業,卻認為能創作「勁揪體」,是福份,因為字體本來就是用以捍衛正體字及廣東話。「聽過有啲小朋友講講下廣東話會突然轉channel講普通話,有朋友的仔女用廣東話唔識表達抽像概念,只識用普通話。」普教中令我們的母語勢危,廣東話被邊緣化,他希望利用設計產品講述社會事件。「始終唔係睇到結果先至堅持,係堅持先知有無結果。」

「勁揪體」源於雨傘運動,曾被用以製作「我要真普選」橫額。這幾年,字體出現在多個活動的宣傳品上,他認為「勁揪體」最「勁揪」的一次出場,始終是港中足球大戰為香港隊打氣的「香港勁揪」旗幟。「嗰次比較多人留意,比起用於政治口號傳播得更廣。字在旗上視覺衝擊好大。」球迷揮舞「香港勁揪」紅旗撐自己人,零舍熱血沸騰。

蝕入肉捱下去
得到多位「老細」支持,他認為字體盛載社會責任,他接廣告或與機構合作都會三思。「始終要對支持者負責,都推過job。」有人認為他籌六十五萬製作一套字體相當豐足,他笑指「勁揪體」是蝕本貨。「當初計漏好多嘢,要搵律師做文件、開發拼合字體軟件、一個助理唔夠、工作室加租等等。又唔可以接好花時間嘅job,怕唔可以如期完成。」他說去年完全沒有額外工作,只靠前年的工作酬金過活。「戶口數字插水,想衝又唔可以衝,始終未完成唔可以計劃未來其他嘢,真係只可以活在當下,面對現實。」「勁揪體」接近完成階段,他突然獲得多個工作機會。「好似食屎食到一個點,突然跌一啖砂糖落來咁。」否極泰來這句話,嗒落有智慧。

勁揪體蚊型展
日期:即日至12 月 12 日(1200-2100)
地點:觀塘 HOW

Source: https://bkb.mpweekly.com/文化/20181201-88267


>>Continue